-ਵਿਕਾਸੀ ਕਾਰਜਾਂ ਦੀ ਰਿਪੋਰਟ ਤਿਆਰ ਕਰਕੇ ਡੀ.ਸੀ. ਗੁਰਦਾਸਪੁਰ ਨੂੰ ਸੌਂਪੀ ਜਾਵੇਗੀ: ਐਸ.ਡੀ.ਐਮ. ਰੰਧਾਵਾ

ਕਲਾਨੌਰ, 20 ਅਗਸਤ(ਵਰਿੰਦਰ ਬੇਦੀ)-ਜ਼ਿਲ੍ਹਾ ਗੁਰਦਾਸਪੁਰ ਦੇ ਇਤਿਹਾਸਕ ਕਸਬਾ ਕਲਾਨੌਰ ਦੀ ਜ਼ਮੀਨ ’ਚ ਸਥਿਤ ਸਰਕਾਰੀ ਗਊਸ਼ਾਲਾ ਜੋ ਜ਼ਿਲ੍ਹਾ ਪਸ਼ੂ ਭਲਾਈ ਸੋਸਾਇਟੀ ਕੈਟਲ ਪਾਊਡ ਗੁਰਦਾਸਪੁਰ ਅਧੀਨ ਚੱਲ ਰਹੀ ਹੈ ਵਿੱਚ ਹੋਣ ਵਾਲੇ ਲੋੜੀਂਦੇ ਪ੍ਰਬੰਧਾਂ ਅਤੇ ਨਵੇਂ ਵਿਕਾਸੀ ਕਾਰਜਾਂ ਦੀ ਰਿਪੋਰਟ ਤਿਆਰ ਕਰਨ ਲਈ ਐਸ.ਡੀ.ਐਮ. ਕਲਾਨੌਰ ਸ. ਲਛਮਣ ਸਿੰਘ ਰੰਧਾਵਾ ਦੀ ਅਗਵਾਈ ’ਚ ਟੀਮ ਵਲੋਂ ਸਰਕਾਰੀ ਗਊਸ਼ਾਲਾ ਦਾ ਜਾਇਜਾ ਲਿਆ ਗਿਆ।

ਟੀਮ ’ਚ ਲੋਕ ਨਿਰਮਾਣ ਵਿਭਾਗ, ਪੰਚਾਇਤ ਵਿਭਾਗ, ਮਾਲ ਵਿਭਾਗ ਵੀ ਸ਼ਾਮਿਲ ਸੀ। ਐਸ.ਡੀ.ਐਮ. ਸ. ਰੰਧਾਵਾ ਦੀ ਅਗਵਾਈ ’ਚ ਟੀਮ ਵਲੋਂ ਗਊਸ਼ਾਲਾ ’ਚ ਪਸ਼ੂਆਂ ਨੂੰ ਮਿਲਣ ਵਾਲੇ ਚਾਰੇ ਵਾਲੇ ਸੈੱਡ, ਤੁੜੀ ਵਾਲੇ ਸੈੱਡ, ਪਸ਼ੂਆਂ ਦੇ ਬੈਠਣ ਵਾਲੇ ਸਥਾਨ, ਚਾਰੇ ਵਾਲੀਆਂ ਖੁਰਲੀਆਂ, ਪੀਣ ਵਾਲੇ ਪਾਣੀ ਦੇ ਸਥਾਨ ਅਤੇ ਵੱਖ ਵੱਖ ਸੈੱਡਾਂ ਦਾ ਜਾਇਜਾ ਲਿਆ ਗਿਆ।

ਐਸ.ਡੀ.ਐਮ. ਸ. ਰੰਧਾਵਾ ਵਲੋਂ ਗਊਸ਼ਾਲਾ ’ਚ ਕੰਮ ਕਰਨ ਵਾਲੇ ਕਾਮਿਆਂ ਨਾਲ ਗੱਲਬਾਤ ਕਰਕੇ ਹਲਾਤਾਂ ਬਾਰੇ ਜਾਣਕਾਰੀ ਪ੍ਰਾਪਤ ਕੀਤੀ ਗਈ। ਸ. ਰੰਧਾਵਾ ਨੇ ਸਫਾਈ ਪ੍ਰਬੰਧਾਂ ਲਈ ਸਬੰਧਤ ਠੇਕੇਦਾਰ ਨੂੰ ਮੌਕੇ ’ਤੇ ਹਦਾਇਤਾਂ ਕੀਤੀਆਂ ਗਈਆਂ ਕਿ ਤੁਰੰਤ ਸਫਾਈ ਕਾਰਜ਼ ਕੀਤੇ ਜਾਣ ਅਤੇ ਗਊਆਂ ਦੇ ਬੈਠਣ ਵਾਲੇ ਸਥਾਨਾਂ ਦੀ ਸਫਾਈ ਕਰਵਾਈ ਜਾਵੇ। ਪਸ਼ੂਆਂ ਦੇ ਚਾਰੇ ਦੇ ਸਬੰਧ ’ਚ ਵੀ ਕੰਟਰੈਕਟਰ ਨੂੰ ਤਾੜਨਾਂ ਕੀਤੀ ਕਿ ਪਸ਼ੂਆਂ ਨੂੰ ਖਾਣ ਲਈ ਲੋੜੀਂਦੇ ਚਾਰੇ ਦੀ ਕਮੀਂ ਨਹੀਂ ਆਊਣੀ ਚਾਹੀਦੀ। ਐਸ.ਡੀ.ਐਮ. ਸ. ਰੰਧਾਵਾ ਨੇ ਕਿਹਾ ਕਿ ਕੁੱਝ ਜਰੂਰੀ ਵਿਕਾਸੀ ਕਾਰਜ਼ਾਂ ਸਬੰਧੀ ਉਨ੍ਹਾਂ ਵਲੋਂ ਲੋਕ ਨਿਰਮਾਣ ਵਿਭਾਗ ਦੀ ਟੀਮ ਨੂੰ ਸੂਚਨਾਂ ਤਿਆਰ ਕਰਨ ਲਈ ਕਿਹਾ ਗਿਆ ਹੈ ਅਤੇ ਇਹ ਸੂਚਨਾਂ ਅਗਲੇਰੀ ਕਾਰਵਾਈ ਲਈ ਮਾਨਯੋਗ ਡਿਪਟੀ ਕਮਿਸ਼ਨਰ ਗੁਰਦਾਸਪੁਰ ਨੂੰ ਭੇਜੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਪ੍ਰਸ਼ਾਸ਼ਨ ਗਊਵੰਸ਼ ਦੀ ਸੁਰੱਖਿਆ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ। ਇਸ ਮੌਕੇ ’ਤੇ ਬਲਾਕ ਵਿਕਾਸ ਤੇ ਪੰਚਾਇਤ ਅਫਸਰ ਸ. ਸੁਰਜੀਤ ਸਿੰਘ ਬਰਾੜ, ਲੋਕ ਨਿਰਮਾਣ ਵਿਭਾਗ ਦੇ ਐਸ.ਡੀ.ਓ. ਰੋਹਿਨ ਕੁਮਾਰ, ਮਾਲ ਵਿਭਾਗ ਦੇ ਕਾਨੂੰਗੋ ਭੁਪਿੰਦਰ ਸਿੰਘ, ਰਛਪਾਲ ਸਿੰਘ ਪਟਵਾਰੀ, ਮਨਦੀਪ ਸਿੰਘ ਬੁੱਟਰ ਰੀਡਰ, ਅਨਿਲ ਕੁਮਾਰ ਜੇ.ਈ., ਗੁਰਸ਼ਰਨਜੀਤ ਸਿੰਘ ਵੀ ਹਾਜ਼ਰ ਰਹੇ।